O luns, 22 de marzo, celebrase o primeiro pleno do Observatorio da Sociedade da Información e a Modernización de Galicia (OSIMGA), Esta nova entidade é o resultado da integración do Observatorio Galego da Sociedade da Información co Observatorio da Calidade e da eAdministración de Galicia, que atendían ámbitos cada vez máis próximos, facendo necesaria unha actuación máis eficiente que evitase a superposición de ambas as actuacións. Ademais, búscase acadar unha maior coherencia e uniformidade no eido da observación da sociedade da información e a modernización das administracións públicas de Galicia mediante a integración das funcións deses dous organismos nun único observatorio.

O Osimga constitúese como órgano asesor para a valoración da evolución da sociedade da información en Galicia. Ademais promoverá a participación e a colaboración coas distintas administracións públicas nesta materia así como con outros observatorios, organismos e entidades para promover o intercambio de información e experiencias

Como punto de partida para iniciar o seu labor presentarase no transcurso da xuntanza o informe “Estado da Sociedade da Información en Galicia 2009”, que reúne información básica sobre este aspecto no momento actual facilitando análises comparativas con outros marcos xeográficos a nivel de cidadanía, empresas, eGoberno, sector empresarial TIC e telecomunicacións. Do datos recollidos neste estudo se desprende que aínda que os indicadores avanzan positivamente o nivel de equipamento e uso das TIC entre a cidadanía e as microempresas rexistran valores inferiores ao conxunto do Estado. Sen embargo, cómpre sinalar o alto nivel de uso da administración electrónica e o impulso que exerce o sector TIC pola súa capacidade de xeración de emprego e pola súa condición de acelerador do cambio tecnolóxico.

Fonte: Xunta de Galicia